باتىس قازاقستان وبلىستىق پەريناتالدىق ورتالىققا مينسك قالاسىنداعى پەريناتالدى دياگنوستيكالىق ورتالىعىنىڭ جەتەكشىسى، مەديسينا عىلىمىنىڭ كانديداتى، جوعارى بىلىكتى دارىگەر الەكسەي چۋكانوۆ كەلىپ، ۋلترا دىبىستىق زەرتتەۋ باعىتى بويىنشا ءوڭىر دارىگەرلەرىمەن  تاجىريبە الماستى.

بىلىكتىلىك دارىسىنە وڭىردەگى ۋدز-ى سالاسى بويىنشا قىزمەت اتقارىپ جۇرگەن  سالا ماماندارى قاتىستى. باسقوسۋدا ۋلترادىبىستىق زەرتتەۋدىڭ دياگنوز قويۋدا، جاتىرداعى ۇرىقتىڭ كۇيىن باقىلاۋدا كەڭىنەن قولدانىلاتىن تەكسەرۋ ءادىسىنىڭ ءتۇرى ەكەندىگى جانە ۇرىقتىڭ جىنىسىن انىقتاپ قانا قويماي، بولاشاق نارەستەنىڭ جاتىرداعى دامۋىنان تولىق اقپارات بەرەتىندىگى. ق ر دەنساۋلىق ساقتاۋ جانە الەۋمەتتىك دامۋ مينيسترلىگى بەكىتكەن ەرەجە بويىنشا جۇكتىلىك بارىسىندا ءۇش رەت عانا ۋدز جاساۋعا رۇقسات بەرىلگەن بولاتىن. ءبىرىنشىسى 10-14 اپتادا بولسا، ەكىنشىسى 20-24 اپتادا، ءۇشىنشىسى 30-34 اپتادا تۇسىرىلەدى.

ماماننىڭ ايتۋىنشا، العاشقى ۋدز دارىگەرگە جۇكتىلىك مەرزىمىن ناقتى انىقتاۋعا جانە ۇرىقتىڭ دامۋىندا قانداي دا ءبىر اۋىتقۋشىلىقتار بار-جوعىن انىقتاۋعا مۇمكىندىك بەرەدى ەكەن. جاتىرداعى نارەستەنىڭ دامۋى، جولداسىنىڭ (پلاسەنتا) كۇيى، قاعاناق سۋىن (وكولوپلودنىە ۆودى)، بوسانعانعا دەيىن بالانىڭ جىنىسى كەلەسى زەرتتەۋلەر بارىسىندا باقىلانادى.  20-24 اپتادا بارلىق ۇرىق ورگاندارى تولىقتاي دامىپ، قالىپتاسادى. وسى كەزەڭدە جاسالاتىن ۋدز سول دامىعان اعزالاردىڭ قالىپتى جاعدايدان اۋىتقۋىن انىقتاۋعا مۇمكىندىك بەرەدى. ۋدز ارقىلى ۇرىقتىڭ بەت-پىشىنىن كورىپ، كوزىنىڭ اراقاشىقتىعىن بايقاپ، مۇرىن سۇيەگىنىڭ ۇزىندىعىن، ەرىن جانە تاڭداي جىرىعى اۋرۋلارىن كورۋگە بولادى. مي، جۇرەك، اسقازان، وكپە، بۇيرەك، ىشەك، قۋىق، ومىرتقا قالاي دامىپ جاتقانى تۋرالى دا بىلۋگە بولادى. سوندىقتان وسى كەزەڭدەگى ۋدز-نىڭ ماڭىزى جوعارى. 30-34 اپتالىق كەزىندە جۇرگىزىلەتىن ءۇشىنشى ءۋدز-نىڭ نەگىزگى ماقساتى – بالانىڭ بوسانار الدىنداعى جاعدايى مەن جاتىردا قالاي جاتقانىن انىقتايدى. ياعني بالا باسىمەن نەمەسە قۇيرىعىمەن كەلىپ تۇر ما، كىندىك مويىنعا وراتىلىپ جاتقان جوق پا، سالماعى قانداي، بۇرىنعى زەرتتەۋلەر كەزىندە بايقالماي قالعان اقاۋلار جوق پا – وسى سۇراقتارعا جاۋاپ الىنادى ەكەن.

باسقوسۋدان سوڭ وبلىستاعى  پەريناتالدىق ورتالىقتاردىڭ 25 مامانى  حالىقارالىق دەڭگەيدەگى سەرتيفيكات  يەلەندى.

گۇلىم اقاپ،

باتىس قازاقستان وبلىسى